Taasisi za kupambana na vitendo vya udhalilishaji vyatakiwa kutekeleza majukumu kwa uwadilifu.

Na Thabit Madai-Zanzibar

Taasisi za kupinga na kupambana na vitendo vya udhalilishaji Nchini kwa  kushirikiana na vyombo vya kusimamia sheria Mkoa wa kusini Unguja zimetakiwa kutekeleza  majukumu yao  Kwa uadilifu  ili wahanga wa matukio hayo waweze kupata haki yao.

Wito huo umetolewa na Mkuu wa Mkoa wa Kusini Unguja Ayoub Mohammed Mahmoud  wakati  akifungua  mkutano  wa kutathimini mpango mkakati wa utekelezaji wa hifadhi ya  Mtoto  kwa kipindi Cha Miezi  sita  kupitia mradi wa  UNICEF uliowashirikisha  maafisa  kutoka katika taasisi
mbalimbali za  Mkoa.

Alisema umoja, ushirikiano na uadilifu wa taasisi hizo ndio njia pekee itakayowezesha kupiga hatua ya kupunguza  na kuondoa vitendo hivyo kwani vinapelekea kuathiri mila, hulka na desturi za taifa.

Aliwataka watendaji  hao kuhakikisha   kila mmoja anawajibika kwa nafasi yake ili kuondosha malalamiko kwa wananchi.

Aidha alisema  Serikali itachukua juhudi za kuzitafutilia kesi hizo na kuzipatia ufumbuzi changamoto zilizobainika katika tathimini ya kikao hicho ambazo zinasababisha kukwamisha mwenendo mzima wa kesi za vitendo hivyo.

Hata hivyo aliwataka Wananchi kuacha kuvifumbia macho vitendo hivyo na badala yake waendelee kusimama imara katika kutoa ushahidi wa  kesi hizo zinapofika Mahakamani ili kuisadia Mahakama Kutoa hukumu kwa mujibu wa sheria.